जैतापूर एज्युकेशन सोसायटी, मुंबई संचालित न्यू इंग्लिश स्कूल, जैतापूर शाळेची स्थापना १३ फेब्रुवारी १९१९ साली झाली. सुरवातीला दांडेकर यांच्या वाडयामध्ये शाळेचे वर्ग भरत असत. त्यानंतर आता दिसणारी शाळेची इमारत तत्कालीन समाज धुरीनांच्या अथक परिश्रमाने साकार झाली. शाळेला स्वताच्या मालकीची जागा देण्यापासून ते इमारत बांधण्यापर्यत सक्रीय योगदान देण्याचे मोलाचे कार्य संस्थेचे माजी कार्यवाह कै.जनार्दन मुरारी सुभेदार ऊर्फ अण्णा यांनी केले.

इयत्ता पाचवी ते दहावी पर्यंत असलेली माध्यामिक शाळा पुढे १९९० साली कनिष्ठ महाविद्यालय पर्यंत वाढत गेली. कला व वाणिज्य शाखा असलेल्या कनिष्ठ महाविद्यालयाचे श्रीमती स्नेहलता रामचंद्र मांजरेकर असे नामकरण झाले.

सध्या शाळेत १० शिक्षक विद्यार्जन करीत असून इतर ३ कर्मचारी त्यांना सहाय्य करीत आहेत. शाळेत सुमारे ३५० विद्यार्थी अध्ययन करीत आहेत.

संस्थापक

तेथे कर अमुचे जुळती

न्यू इंग्लिश स्कूल, जैतापूर शाळा शताब्दीकडे झेप घेत असताना आज तीव्रतेने आठवण येत आहे ती स्व. जनार्दन मुरारी सुभेदार यांची. ते सर्वांना “अण्णा ” म्हणून परिचित. सुमारे ५० वर्षे सलग ते जैतापूर एज्युकेशन सोसायटी या संस्थेचे कार्यवाह होते. “एकचि तारा समोर आणिक पायतळी अंधार’या ध्येयनिष्ठेने त्यांनी ह्या एकाच संस्थेसाठी तन,मन,धनाने आपले आयुष्य वेचले. शाळेखेरीज अन्य विषय कधीही त्यांच्यासमोर नसे. आज शाळेला जे विशाल स्वरूप प्राप्त झाले आहे ते या तपश्चर्येचे फलित आहे असे म्हटले तर अतिशयोक्ती ठरू नये.